Vallë, anarkia ku do na shpjerë?

Vallë, anarkia ku do na shpjerë?

Nga Faik Konica

 

Në një artikull, të botuar, kur mësuam se ra Guverna e Pandeli Vangjelit, i këshilloja Parlamentit të ftojë Fan Nolin në krye të kabinetit të ri. Dhe shumë njerëz, këtu në Amerikë, si matanë të ujit, ishin të bashkuar në atë mendim. Po pak ditë pastaj ngjau një gjë e papritur: Korça, kurdoherë e patrembur, përzuri Jakovin edhe thirri në vend të tij Fan Nolin, i cili hyri në mes të entusiazmës popullore dhe meshoi në Shën Gjergj. Atëhere secilido ndryshoi mendimin që pati, edhe tha se puna e do që paskataj Fan Noli të heqë dorë nga politika dhe të rrijë në Korçë, ku me diturinë dhe talentin e tij, do të bëhet për pak kohë jo vetëm kryetari fetar i njohur i gjithë orthodoksëve shqiptarë, po ndofta edhe njeriu më i besuar, më i pyetur dhe më i dëgjuar i tërë Shqipërisë.

Për fat të zi, era e politikës fryjti ndryshe; dhe pak ditë më vonë na erdhi e reja se Fan Noli u bë Ministër i Punëve të jashtme. Që të thomi të drejtën, kjo candë s’na gëzoj tepër: kemi frikë që rasti, për të themeluar në Korçë një fortesë morale dhe qytetëronjëse, mos humbi për shumë kohë; pastaj, në qoftë se e donte puna që të kthehej në politikë, dëshirojmë që hyrja e Fan Nolit në Guvernë të ish në kondita të tjera. Por,  sidoqoftë, kishim shpresë se Fan Noli, bir dhe udhëheqës i Vatrës e i shqiptarëve të Amerikës, do të mundohej të vente në punë ca nga idealet që kemi ushqyer për Shqipërinë më  këtë anë të ujit; -edhe donim, në një artikull nën emrin”Fan Noli dhe “Vatra”, t’i përmendim detyrën morale që e lidh dhe e shtrëngon të punojë për ato ideale, pa vënë re pallavrat e errëta që hedhin ca studentë të Universitetit Latour e të Akademisë Bussi, për të cilët, kurdoherë, koha e qytetërimit ”nuk arriu edhe”, por koha e plaçkitjes arriu dhe duhet të mbetet.

S’kam ndonjë dyshim që Fan Noli, në poezitë e reja të tij, s’do të kish harruar asnjë nga idealet e shkuara dhe do të nderonte përsëri veten e tij dhe VATRËN që e përkrahu dhe gjithnjë do ta përkrahë. Po për fat të keq, në moving picture (apo më mirë moving tragedy) të Shqipërisë, filmi i fundit na tregon ca lodra të rrezikshme që s’lënë më vend  për fjalë programi dhe reformash, po bërtasin për një shpëtim të shpejtmë të Shtetit, i cili u trondit dhe është në të gremisur e sipër. Shqiptarët kishin zakon të thoshin se shpëtimin dhe përparimin e Shtetit e ndalojnë tre veta: Esadi (Toptani), Bib Doda, Ismail Qemali. Njëri nga këta vdiq, dy u vranë. Që të tre u zhdukën.

Po në vënd të tyre dolën një duzinë tiranë dhe intriganë të tjerë. Qetësia dhe shtrimi s’bënë asnjë çap në Shqipëri. Përkundrë, turbullimet u shtuan. Se më parë kish një ballancë të tiranisë në Shqipëri: despotizma e Esadit në mes, intrigat e Bib Dodës në Veri, gënjeshtrat e Ismail Qemali në Jug, rëndonin njëra kundër tjetrës. Kur shkuan Bib Doda me Ismail Qemalin, duallën në ato vënde një grup tiranësh dhe vagabondësh të cilët menjëherë ballancuan tiraninë e Esadit. Si u zhduk Esadi, ballanca u prish menjëherë:

U sulën në shesh një tokicë aventurierësh, të dehur me ambicje, të ndezur nga etja e pasurisë, të tërbuar nga lakmia e fuqisë dhe e arit, të cilëve nuk u vë ndonjë fre as ndërgjegja e tyre e pazhvilluar, as kodi, për ta i panjohur, i nderit, as ideali i një qytetarie të lartë e i një atdhesie të hollë, ku s’u arrin kurrë mendja.

Këta aventurierë të përgjakur i ruante deri dje frika e Esadit: I vdekur Esadi, s’ka më asnjë pengim dhe nisi mes tyre një luftë e ashpër për diktaturë dhe fuqi. Secilido nga ata është kandidat për vendin e Esadit. Ngjarjet e sotme tregojnë sheshit gabimet e atyre filozofëve kafenesh që kujtojnë se shpëtimi i Shqipërisë varet nga vrasja e dy apo tre vetëve. U vranë, po puna s’ndryshoi aspak.

Dhe po të dalin nesër disa patriotë katilë, që t’i qërojnë tiranët zëvendës të Esadit, vepra kriminale idealiste e tyre do të vejë prapë e humbur. Se këtu s’ke të bësh me ca njerëz të veçuar, ke të bësh me një pemë që e pjell Dheu i Shqipërisë. Dhjetë të qëruar, një mijë të tjerë të lindur!

          Fati më i rrezikshëm dhe që çfaq në ç’hall ndodhet vendi, është se oficerët, nëpunësit, mësonjësit gjithë veglat e Shtetit, marrin pjesë në trazimet politike:dhe me trembje, me dezertim, me strajk, duhet të bëhet e tyrja.

Lakmimi i cave e shpuri Shqipërinë në Anarki. Vallë anarkia ku do ta shpjerë vendin? Në ndarje, apo në një mandat të huaj?

Fan Noli do t’i bënte shërbimin më të madh Shqipërisë, sikur të ish i zoti të klliste pak frymë rregulle, drejtësie dhe bindjeje në mes të asaj turme të dehur e cila vë në rrezik një popull të pafajshëm, të shënuar nga dora e fatit për një vdekje të afërme dhe të turpshme.

 

Botuar më 1922

Related posts